Hierdie drama uit die pen van Deon Opperman is die eerste ná Kaburu, waarvoor hy sy tweede Hertzogprys gekry het. ’n Vrou (Hanli Rolfes) keer ná twintig jaar terug na haar grootwordplaas en ontdek haar jeugliefde (Deon Coetzee) is die nuwe eienaar. Hy het nooit getrou nie. So begin ’n verhaal van herontdekking, konfrontasie, vergifnis en uiteindelik die insig dat die dinge wat in woede geskreeu word, nie iets beteken nie, maar wel dié wat gefluister word. Mense skreeu: “Ek haat jou.” Maar hulle fluister: “Ek het jou lief.”
80 min. R85 en R90 Die Skuur
Saterdag 7 Aug. 12:00
’n Fisieke-teaterstuk waarin die wêreld van beweging en musiek gekombineer word met die konkreetheid en bekendheid van brood. Verhale en gedigte uit die pen van Suid-Afrikaanse skrywers (Sheila Cussons, Petra Müller en Abraham de Vries) sowel as buitelandse skrywers (Christina Rossetti, AA Milne en Daniel Leader) word gebruik en in Afrikaans en Engels aangebied. Die musiekkeuse weerspieël ook die tema van brood, terwyl die bewegingstyl wat deur die akteur Pieter van Zyl aangewend word, die tradisie van die teatermeester Étienne Decroux herroep. ’n Deurlopende verhaallyn word gevolg, maar dit kan ook beskryf word as ’n collage waarin die misterie, geskiedenis en betekenis van brood vanuit verskillende hoeke belig word.
60 min. R60 De Wetsaal
Vrydag 6 Aug. 17:00
Originally written as Lyf by Hennie van Greunen and played by Pedro Kruger, the show was hailed as a tour de force from the start. It transports the audience, willingly and believingly, into a make-believe world which so accurately mirrors real life that the lines become blurred and that people’s opinions and perceptions are changed in the process. Kruger’s skills as composer, actor, pianist, storyteller and performer are utilised to the full in this poignant, outright funny and often moving production. The play was later translated into English, and in August 2009, it was performed at the Edinburgh Fringe Festival in Scotland. The show was awarded the fringereview.com Hidden Gem Award. Shirley Ellis adds her sensitive direction to the product. 60 min. R70 Civic Centre
Saturday 7 Aug. 18:30 and Monday 9 Aug. 10:00
Die internasionale treffer Tuesdays with Morrie, deur Mitch Albom, is deur Albom en Jeffrey Hatcher vir die verhoog aangepas. Nou span twee van ons mees talentvolle akteurs vir die eerste keer saam om die deernisvolle verhaal in Afrikaans lewe te gee. Morrie (Chris van Niekerk) is ’n Sosiologie-professor aan die US en Tiaan (Pedro Kruger) een van sy oudstudente. Leermeester en student is albei by ’n kruispad in hul lewens: Morrie word met ’n terminale siekte gediagnoseer en ’n ontnugterde Tiaan besluit om sy ou prof op te soek.
90 min. R95 Burgersentrum
Vrydag 6 Aug. 20:30 en Saterdag 7 Aug. 09:00
Die genesende invloed van lag
Suid-Afrika beleef moeilike tye – ekonomies sowel as polities. En hoewel sakelui meen dat ons pas uit ’n resessie gekom het, glo heelwat ekonome dat ons heelwaarskynlik ’n tweede resessiegolf sal moet uitry.
Op politieke vlak heers ook groot onsekerheid, en menige Suid-Afrikaner hou die regerende party fyn dop.
Midde-in dié moeilike situasie het mense nodig om te lag. Dit is ’n bewese feit dat slegs optimiste opstaan en seker maak dat dinge gebeur.
Een manier om positief en optimisties te raak, is om te lag – selfs sielkundiges doen doktorale verhandelinge oor die genesende invloed van lag. Wat ’n beter manier dan om seker te maak dat lesers kaartjies bekom vir die HermanusTimes Kalfiefees, van 5-9 Augustus, se reeks komedies wat vanjaar opgevoer gaan word.
Die komedies is:
Met die Holm gebore
Dit word gespeel deur die bekende Marion Holm, wat elke jaar vir ons ’n ander “Sussie”-storie gebring het. Om met die helm gebore te wees is een ding, maar om met die Holm gebore te wees, is nie net een ding nie. . . Dis nóg ’n ding en vier ander goed, saam met ’n stuk watsenaam en sewe uitroeptekens.
Oupa en Ouma raak romanties
Dié komedie met Johan en Lida Botha het ses vertonings by die KKNK gehad, en almal was uitverkoop.
Met meer as 70 vertonings landwyd is Oupa en Ouma nou reg vir die Kalfiefees.
Pille en brille
Dié stuk word deur Marga van Rooy-produksies na die fees gebring en is ’n heerlike klug oor senior burgers en senior oomblikke. Twee vriendinne wat verslaaf is aan 7de Laan en Noot vir noot, weet nie hoe hulle dit het wanneer ’n nuwe wewenaar by hul aftreeoord intrek nie. Wie moet vir wie lugtig raak, want die kompetisie vir aandag raak sterk.
Die laaste Afrikaanse superhero
Leon Kruger en Esther von Waltsleben is albei akteurs wat oor bonatuurlike komiese talente beskik. Kruger se vermoë om sy gesig te verwring is genoeg rede om die stuk te sien. Die laaste Afrikaanse superhero is ’n handleiding vir die moderne man met outydse waardes.
Bure oppie bank – deur Saartjie Botha
Dit word gespeel deur Neels van Jaarsveld (die eish!-man) en Zane Meas (Neville in 7de Laan). Die twak spat in hierdie komedie wanneer Toks Abrams (Meas) en Flip Botha (Neels) mekaar beetkry oor rugby, vroumense, skoonma’s, gereedskap en ’n stukkende kar se verkoop. Flip eet niks vir soetkoek op nie, behalwe Toks se raad oor hoe hy sy aanstaande verloofde moet benader. Voeg by ’n waterdigte plan oor hoe om jou kar te laat steel – en jy begryp waarom die gehore so skater. – Ronelle Terre’Blanche